तुतारी // इतिहास लेखन के सच्चाई...

छत्तीसगढ़ म अभी जइसन किसम के इतिहास लेखन होवत हे, वोकर ऊपर विश्वास करना मुश्किल होए अस लागथे। बाहिर ले आये कथित विद्वान मन बाहरीच ग्रंथ अउ संदर्भ के आधार म छत्तीसगढ़ ल परिभाषित करत हें। दुनिया के इतिहास के मानक उहां के मूल निवासी मन होथे। इहां के मूल निवासी मन के  मानक म कब इतिहास अउ संस्कृति ल लिखे जाही, ए बात के अगोरा हे।

सुशील भोले  
9826992811, 8085305931

तुतारी // 'स्वाभिमान" अब नइ रिहिस...?

क्षेत्रीय दल 'स्वाभिमान मंच" ल पहिली बेर वोकर संस्थापक के बेटा बोरे रिहिसे, अउ अब बांचे-खोचे ल नवा-नेवरिया बने अध्यक्ष ह बोर दिस। माने अब 'स्वाभिमान" नइ रिहिस। 'स्वाभिमानी" मन पहिली भजपा के सरन म गेइन, अब के मन कांग्रेस के जोगी संस्करन म हमागे हें। कुल मिला के क्षेत्रीय दल के मूल स्वरूप अउ उद्देश्य राष्ट्रीय पार्टी वाले मन के छइहां म थिरागे, सिरागे...

सुशील भोले  
9826992811, 8085305931

तुतारी // विधानसभा म छत्तीसगढ़ी...

देश के अधिकांश राज्य के विधानसभा म उहां के मातृभाषा म ही सबो काम-काज होथे। मंत्री-विधायक मन उहां के जनभाषा म ही आपसी संवाद करथें, बहस करथें। फेर छत्तीसगढ़ एक अइसन राज्य आय जिहां के विधानसभा म अइसन देखे बर नइ मिलय। ए राज के सरकार कहे बर तो छत्तीसगढ़ी ल प्रदेश स्तर म राजभाषा के दरजा दे दिए हे। राजभाषा आयोग के स्थापना कर दिए हे, फेर सब देखाए भर के हे। इही सबला देखत अवइया 11 जुलाई दिन सोम्मार के बिहनिया 10 ले 12 बजे तक इहां के महतारी भाखा के मयारुक मन छत्तीसगढ़ विधानसभा भवन के आगू म जम्मो विधायक मनला छत्तीसगढ़ी म गोठियाए खातिर उदिम करहीं। आपो मनले अरजी हे जादा ले जादा संख्या म अपन हाजिरी दे के उदिम करहू।

सुशील भोले
9826992811, 8085305931

तुतारी // विधायक ल सबक...

राजनीति के चस्का लगते लोगन लबारी मारे, ठगे, भुलवारे म मगन हो जाथें। अइसन मनला सबक सिखाए बर बस्तर के झाड़उमर गांव के मन ठउका उपाय निकालिन। गांव म बोरिंग लगवाए बर विधायक ल घेरी-भेरी अरजी करंय फेर विधायक धियाने नइ देवय। गांव के मन वोला चिढ़ाए बर लकड़ी के बोरिंग बना के चार-पांच जगा गडिय़ा दिन अउ वोकर उद्घाटन करे बर विधायक ल बलाइन। विधायक लाज के मारे आइस तो नहीं फेर गांव म एक ठन बोरिंग जरूर लगवा दिस।

सुशील भोले
9826992811, 808530593

तुतारी // अंजोर या अंधियार छत्तीसगढ़...

देश भर के जुरियाये कलेक्टर मन के बइठका म मुख्यमंत्री जी काहत रिहिन हें- छत्तीसगढ़ म बिजली सरप्लस हे। इहां के दुकान मन म अब मोमबत्ती बेचाना बंद होगे हे। शहर, गांव, फैक्टरी, खेती सबो म अंजोर के डेरा हे। राजधानी रायपुर ले लगे कतकों गांव के लोगन काहत रिहिन हें- का करबे भइया बिजली कतका बेर आथे, कतका बेर जाथे, तेकर ठिकाना नइए। इहां के कतकों गांव तो अइसन हे, जिहां आज तक बिजली के दर्शन घलो नइ होए हे।

सुशील भोले
9826992811, 808530593

तुतारी // सच या साजिश...?

बिलासपुर आईजी के संबंध म एक महिला आरक्षक ले संबंधित जइसन खबर आवत हे, वोमा कतका सच्चाई या साजिश हे, ये तो जांच के बाद पता चलही। फेर एक बात जरूर हे के ये विभाग के कतकों कर्मचारी-अधिकारी अपन आप ल कानून ले ऊपर समझथें, कतकों किसम के गैर कानूनी काम म लगे रहिथें। एकर सेती कोन कतका दूध के धोए हे एला कहना अभी सही नइए।

सुशील भोले
9826992811, 808530593

तुतारी // अपराधगढ़ बनत छत्तीसगढ़...

रमन सिंह के छवि एक सीधा-सरल अउ अच्छा मनखे के जरूर हे, फेर ए बात घलोक सोला आना सच हे के प्रशासन म उंकर पकड़ वतके ढिल्ला हे। चोर-उचक्का-लूटेरा-हत्यारा-भ्रष्टाचारी मन के जेन अति अभी इहां देखे बर मिलत हे, अइसन कभू नइ रिहिसे। एकर पहिली अजीत जोगी के शासन घलो देखे हे छत्तीसगढ़ ह। जोगी के चाहे कतकों  राजनीतिक आलोचना करे जाय, फेर जिहां तक शासन के बात रिहिसे, कोई भी अपराधी तत्व, अपराध करे के पहिली चार बार सोंचय अउ कांपत जरूर रिहिसे।

सुशील भोले
9826992811, 808530593