अप्पत होगे टूरा निच्चट....

अप्पत होगे टूरा निच्चट नइ मानय एक्कोच बात
खोरकिंजरा कस किंजरत रइथे दिन चिन्हय न रात
महूं गुनथौं कहूं बेटी होतीस करतीस संवागा घर के
हाथ बंटातीस दाई के अउ खवातीस चुरो के भात
सुशील भोले

नंगत झड़क ले बासी....

दिन आगे हे गरमी के नंगत झड़क ले बासी
दही-मही के बोरे होवय चाहे होवय तियासी
तन तो जुड़ लागबे करही मन घलो रही टन्नक
काम-बुता म चेत रही नइ लागय कभू उदासी
*सुशील भोले*

आ दरपन तैं देख जउंरिहा...

आ दरपन तैं देख जउंरिहा कइसे दिखथे चेहरा
तोर रूप तो धंस गे हावय जइसे गड्ढा-दहरा
का बात के भरम म हावस कइसे चिक्कन अंग हे
करम के कालिख तो उपकत हे रंग घलो हे गहरा
*सुशील भोले*

पहिली सुमरनी तोर....

पहिली सुमरनी तोर गजानन तहीं विघ्ना के हरता
दाना-दाना जोर-सकेल के शुभकारज के करता
तहीं बिपत के संगी-साथी, सुख के तहीं मितान
तोर सरन म जे-जे आथें, बनथस सबके भरता
*सुशील भोले*

कुल पाये हन कुरमी....

करम करे बर जनम लिए हन कुल पाये हन कुरमी
जांगर टोर सोना उपजाथन चाहे भुइयां राहय मुरमी
क ख ग हमर खेती-बारी इही गीता-वेद के ज्ञान
हमरे खातिर लोगन खाथें पेट भर ठेठरी-खुरमी
*सुशील भोले*

तभो कहाथे दाऊ......

पर भरोसा तीन परोसा, जांगर देखबे त फाऊ
सिरतोन निच्चट कोढिय़ा हावय तभो कहाथे दाऊ
नौकर-चाकर खटत रहिथें घर-खेत म वोकर
तबले लांघन-भूखन रहिथें, एला देखबे त खाऊ
*सुशील भोले*

नवा बहुरिया आही......

बर-बिहाव के बजगे बाजा नवा बहुरिया आही
मोर सुघ्घर बाढ़े बेटा ल झम्मक ले ले जाही
पेट काट-काट पोसे हावंव करके भारी जतन
फेर सब कहिथें छोड़ाके मोला अकेल्ला पोगराही
*सुशील भोले*