शीतला मंदिर के बइगा मेर ले...

शीतला मंदिर के बइगा मेर ले लाने हावौं आगी
जोत-जंवारा के बदना म हमू बने हावन भागी
खुल जाही अब भाग हमरो दाई सउंहत आही
बरसाही मया के बरसा संग म खुशहाली लाही

सुशील भोले
संजय नगर (टिकरापारा) रायपुर (छ.ग.)
मोबा. नं. 98269-92811

फेर नेवता हे तोला दाई ...

फेर नेवता हे तोला दाई गरजत-गरजत आबे
चारों मुड़ा रार मचत हे सब्बोच ल सिरवाबे

आज तो बैरी जुलमी मन उज्जर रंग म रहिथें
तोप-ढांक के करम-दोष ल गुत्तुर-गुत्तुर कहिथें

जतका देव-धरम के ठीहा सब म बैरी के बासा
अब्बड़ खोज-खबर कर डारेन अब तोरे हे आसा

शिव के शक्ति तोरेच भक्ति तहीं अब संहार कर
संहारकर्ता के सहभागी पीड़ित जन के उद्धार कर

सुशील भोले
संजय नगर (टिकरापारा) रायपुर (छ.ग.)
मोबा. नं. 98269-92811

धरती दाई कलपत हावय झन..

धरती दाई कलपत हावय झन उझारौ कोरा
आगी ढिलहू जंगल म त तुंहरो परहीच फोरा
देख मौसम के चाल बदलगे तुंहरे करनी आय
ठन-ठन भुइयां म लहुटत हे हमर धान कटोरा

सुशील भोले
संजय नगर (टिकरापारा) रायपुर (छ.ग.)
मोबा. नं. 98269-92811

खुदे उठाना परथे बोझा, जब ..

खुदे उठाना परथे बोझा, जब तक तन म स्वांसा हे
खोरवा-लुलुवा हो जावौ भले, इही बंधना के फांसा हे
चार खांध तो तभे मिलही जब जीव शिव संग मिलही
तब तक घिलर के रेंगना परही जब तक एहर खटही

सुशील भोले
संजय नगर (टिकरापारा) रायपुर (छ.ग.)
मोबा. नं. 98269-92811

बरा-बोबरा संग चुरे हे आज ..

बरा-बोबरा संग चुरे हे आज तो गुरहा चीला
नंगत झड़कबोन हमन तो जम्मो माई-पिला
पितर पाख के जोहार हे बबा धमकही पक्का
कहिथें पुरखा मन ए परब म देखाथें जी लीला

सुशील भोले
संजय नगर (टिकरापारा) रायपुर (छ.ग.)
मोबा. नं. 98269-92811

बीमारी ल नेवता आय जी ...

बीमारी ल नेवता आय जी जादा गंभीर बने रहना
एकरे सेती गुरुजी कहिथे रहना चाही हांसत रहना
खेल-कूद अउ कला-साहित घलो आय एकरे अंग
सदा सलामत रइही जी संगी जे धरही इनकर संग

😀सुशील भोले-9826992811

समाज सेवा के माने नोहे ....

समाज सेवा के माने नोहे बस जात-पात के बात करन
अपने अंग के लोगन ल फटकारन अउ डांड़न-छोड़न
ये तो भरम ये सेवा के अउ आय मानवता के अपमान
अइसन बुता म भीड़े लोगन ल बस बइहा बरोबर जान

(संदर्भ-सामाजिक बहिष्कार, हुक्का-पानी बंद जैसे मुद्दे)
सुशील भोले-9826992811