कतेक सुग्घर तीजा तिहार...

कतेक सुघ्घर परब हवय हमर तीजा के तिहार
गंजमंज-गंजमंज लागत हावय  ददा के दुवार
साल भर म सकलाए हावंय जम्मो बेटी-माई
आज करू-भात के उनला हमर मया-जोहार
🌷सुशील भोले-9826992811

ग्रंथ ल नइ लिखे हे भगवान...

दुनिया के कोनो ग्रंथ ल नइ लिखे हे भगवान
एकरे सेती कहिथंव सबला जांच-टमड़ के मान
जतका ग्रंथ रचइया हें, सब उंकरे अनुभव आय
जेकर भाग म जतका साधना वतके गहिरा जान
-सुशील भोले-9826992811

महुआ के पतरी म पसहर के भात...

महुआ के पतरी म, पसहर के भात।
मिंझर के चुरही, भाजी के छै जात।।
भंइस के दही संग, पाबोन परसाद।
दाई पोता मार के, दिही आसिरबाद।।
महतारी मन लइका खातिर, करे हे उपास।
जुग जुग जिए मोर बेटा, अइसे बिसवास।।
महतारी मन के सदा, सजे रहय सिंगार।
जम्मो झन बर सुग्घर हो, कमरछठ तिहार।।

तब पाबे अधिकार...

जी-हुजुरी करे म पा लेबे भले तैं चटनी कस चटकार
फेर भीरे कछोरा धरबे संघर्ष के रद्दा तब पाबे अधिकार
-सुशील भोले-9826992811

फल तभे मिलही जब आही सीजन....

भले चघावत राह साल भर तैं श्रद्धा के फूल-पान
फेर पूजा के फल तब मिलही जब आही देव-लगन
जइसे रूखुवा फल देथे, जब आथे वोकर सीजन
ठउका अइसने देव-मंडल घलो करथे अपन जतन
सुशील भोले
आदि धर्म जागृति संस्थान रायपुर
मो. 9826992811

छत्तीसगढ़िया राज आइस हे...

सन् 56 ले चले आन्दोलन के अब भाग जागिस हे
कब के घपटे अंधियारी रात सिरतोन पहाइस हे
कोरी भर बछर बीते के बाद अब जनाइस हे
छत्तीसगढ़ म छत्तीसगढ़िया राज आज आइस हे
-सुशील भोले-9826992811

उज्जर करम के अंजोर ले.....

उज्जर करम के चिटिक अंजोर ले पूरा जिनगी उजराथे
एकेच ठोसहा के करम लेख ले कतकोन पीढ़ी तर जाथे
-सुशील भोले