पत्रकारिता के पुरोधा स्वराज्य प्रसाद त्रिवेदी

पुरखा के सुरता//
छत्तीसगढ़ म पत्रकारिता के पुरोधा स्वराज्य प्रसाद त्रिवेदी
    आज के नवा छत्तीसगढ़ म पत्रकारिता के भीष्म पितामह के रूप म चिन्हारी रखइया पं. स्वराज्य प्रसाद त्रिवेदी जी जब बाइस बछर के रहिन तभे बछर 1942 म केशव प्रसाद वर्मा जी संग मिल के अग्रदूत समाचार पत्र के संपादन शुरू करे रिहिन हें. तब अग्रदूत ह साप्ताहिक पत्र के रूप म निकलत रिहिसे, जे ह बछर 1983 ले दैनिक समाचार पत्र के रूप म निकले के चालू होइस. अउ ए ह कतका संजोग के बात आय के बछर 1983 म घलो स्वराज्य प्रसाद त्रिवेदी जी ए अखबार संग सलाहकार संपादक के रूप म जुड़े रिहिन हें.
    मोर जिनगी म जे मन लेखन के रद्दा म अंजोर बगरावत डहर देखाय के बड़का उदिम करीन वोमा त्रिवेदी जी के घलो बड़का ठउर हे. वइसे तो मैं अपन लेखक अउ शिक्षक सियान रामचंद्र वर्मा ल घर म लिखत-पढ़त देख के कागज-कलम डहार चेत करेंव, फेर एमा ठोसहा बुता अग्रदूत के कार्यालय म जाए के बाद ही होइस.
    बछर 1982 के आखिर म मैं अग्रदूत अखबार म काम करे बर गेंव, तब अग्रदूत ह साप्ताहिक निकलत रिहिसे. बछर 1983 म ए ह दैनिक होइस. वो बखत मैं ह कम्पोजिटर के रूप म काम करे बर गे रेहेंव. कविता-कहानी लिखे के उदिम तो छात्र जीवन के बेरा ले अपन सियान ल लिखत-पढ़त देख के होगे रिहिस, फेर पत्रकारिता के समझ नइ रिहिसे.
    अग्रदूत के दैनिक चालू होए के बाद एक दिन मैं एक लेख लिखेंव जेला आदरणीय स्वराज्य प्रसाद त्रिवेदी जी ल देखाएंव. वोला देख के उन खुश होगे, अउ वोमा कुछ काट-छांट कर के दैनिक अग्रदूत के संपादकीय वाले पृष्ठ म छाप दिए रिहिन हें. ए ह मोर जीवन के पहला प्रकाशन रिहिसे.
   फेर मैं कविता कहानी तो पहिलीच के लिखत रेहेंव, भले वो मन कभू छपे नइ रिहिसे. आदरणीय त्रिवेदी जी के द्वारा मोर लेख ल छापे के बाद थोरिक हिम्मत बाढ़ीस, त फेर वो बखत दैनिक अग्रदूत म साहित्य संपादक के रूप म काम करत हमर अंचल के प्रसिद्ध व्यंग्यकार रहे विनोद शंकर शुक्ल जी ल अपन कविता अउ कहानी मनला देखाय लगेंव. आदरणीय शुक्ल जी घलो वोमन ल सुधार सुधार के अग्रदूत के साहित्यिक अंक मन म छाप देवत रिहिन हें.
   तब तक मैं हिंदी म ही लिखत रेहेंव. ए ह संयोग के संगे-संग मोर बर सौभाग्य के बात आय के वो बखत अग्रदूत अखबार म स्वराज्य प्रसाद त्रिवेदी जी अउ विनोद शंकर शुक्ल जी के संगे-संग टिकेन्द्रनाथ टिकरिहा जी घलो संपादकीय विभाग म रिहिन हें. पत्रकारिता के क्षेत्र म मोला त्रिवेदी जी प्रोत्साहित करीन अउ साहित्य लेखन डहार शुक्ल जी त छत्तीसगढ़ी लेखन खातिर टिकरिहा जी. एकरे मन के संगत ह मोर जीवन म गुरुकुल के बुता करीस.
    स्वराज्य प्रसाद त्रिवेदी जी के जनम 1 जुलाई बछर 1920 म होए रिहिसे. उंकर सियान स्वतंत्रता संग्राम सेनानी पं. गया चरण त्रिवेदी जी रिहिन. त्रिवेदी जी के प्राथमिक शिक्षा रायपुर के नयापारा स्कूल म होए रिहिसे. जेला हमन सप्रे स्कूल के नॉव ले जानथन, वो ह तब लारी स्कूल के नॉव ले जाने जाय, जिहां त्रिवेदी जी हाईस्कूल के शिक्षा पाइन.
    त्रिवेदी जी अपन स्वतंत्रता संग्राम सेनानी सियान ले प्रभावित होके नान्हे उमर ले ही देश के आजादी खातिर रेंगइया मन के रद्दा धर लिए रिहिन हें. बछर 1935 ले उन साहित्य अउ पत्रकारिता म सक्रिय होगे रिहिन हें. हिन्दी साहित्य मंडल रायपुर के साहित्यिक पत्रिका 'आलोक' के उन संपादक बनीन. एकर आगू बछर उनला कांग्रेस के पत्रिका के संपादक चुन ले गे रिहिन. बछर 1942 म केशव प्रसाद वर्मा जी के संग मिल के अग्रदूत के संपादन करे लगिन. बछर 1946 म महाकोशल साप्ताहिक के संपादक बनीन. इही महाकोशल अखबार ह बछर 1951 दैनिक अखबार के रूप म छत्तीसगढ़ के पहला दैनिक अखबार के रूप म चालू होइस, अउ एकर संपादक बनीन स्वराज्य प्रसाद त्रिवेदी जी.
   बछर 1954 ले त्रिवेदी जी मध्यप्रदेश शासन के जनसंपर्क विभाग म चल दिए रिहिन, जिहां 1978 तक उच्चाधिकारी के रूप म बुता करत रिहिन. 1987 म शासकीय सेवा ले सेवानिवृत्त होए के पाछू फेर दैनिक महाकोशल म संपादक बनगे रिहिन. अउ फेर अग्रदूत ह जब बछर 1983 म दैनिक अखबार के रूप म चालू होइस, त फेर स्वराज्य प्रसाद त्रिवेदी जी एकर सलाहकार संपादक बनीन. अइसे किसम देखे जाय त त्रिवेदी जी अपन पूरा जिनगी कलम के साधना म मगन रिहिन. ए बखत उन पत्रकारिता के संगे-संग साहित्य सृजन घलो करत रिहिन. मैं उंकर कतकों कहानी अउ कविता मनला अग्रदूत म पढ़त रेहेंव.
   आदरणीय त्रिवेदी जी मोला गजब मया करंय. वइसे तो अग्रदूत अखबार के कार्यालय म अबड़ झन कर्मचारी रेहेन, फेर उन सब मा मैं अकेल्ला रेहेंव जेकर संग उन छत्तीसगढ़ी भाखा म गोठियावंय. अइसने जब कभू अपन घर ले कोनो पत्र-पत्रिका आदि मंगवाना या पहुँचाना होवय, त मुहिच ल जोंगय. उंकर घर तब अग्रदूत प्रेस ले पांच मिनट के रद्दा म ही रिहिस. बाद म मैं जानेंव, के उंकर बेटा के घलो नॉव मोरे असन 'सुशील' हावय. त मोला समझ आइस उंकर अतेक दुलार के कारण ह. आदरणीय त्रिवेदी जी के बेटा आज हमर छत्तीसगढ़ म वरिष्ठ साहित्यकार के रूप म प्रतिष्ठित हावंय- डॉ. सुशील त्रिवेदी जी, जे मन छत्तीसगढ़ राज्य के मुख्य निर्वाचन आयुक्त के पद ले सेवानिवृत्त होए हावंय. डॉ. त्रिवेदी जी संग घलो मोर मयारुक संबंध हे. उंकर संग जब कभू भेंट होथे त उन मोला नॉव ले के संबोधित नइ करंय, भलुक हमर छत्तीसगढ़ी परंपरा के अनुसार 'सहिनॉव' कहिथें.
   स्वराज्य प्रसाद त्रिवेदी जी बछर 1935 ले ही साहित्य अउ पत्रकारिता के रद्दा म रेंगे लगे रहिन हें. 1935 म उन हिंदी साहित्य मंडल के गठन करे रिहिन हें. 1940 के दशक म हिंदी साहित्य सम्मेलन के साहित्य मंत्री रिहिन. वोमन हमर मन असन नवा पीढ़ी ल सरलग आगू बढ़े खातिर प्रोत्साहित करत रिहिन. बछर 1951 म हिंदी साहित्य सम्मेलन के अधिवेशन जबलपुर म होए रिहिसे, तब पदुमलाल पुन्नालाल बख्शी जी ल अध्यक्ष अउ स्वराज्य प्रसाद त्रिवेदी जी ल प्रधानमंत्री चुने गे रिहिसे.
    स्वराज्य प्रसाद त्रिवेदी जी सरलग लिखत तो रिहिन हें, संग म छपत घलो रिहिन हें. कविता संग्रह भूख, बरसों बाद भाषण के पौधे हरियाये, स्वराज गान अउ आदमी रहे न रहे बात रह जाती है, तीसरा किनारा आदि साहित्यिक कृति मन के प्रकाशन होय रिहिसे.
    साहित्य अउ पत्रकारिता दूनों के रद्दा म त्रिवेदी जी के कलम जिनगी के अंतिम बेरा तक सरलग चलत रिहिसे. उन 11 जुलाई 2009 के ए नश्वर दुनिया ले बिदागरी ले के परमधाम के रद्दा धर लिए रिहिन हें. उंकर सुरता ल पैलगी जोहार.
-सुशील भोले
संजय नगर, रायपुर
मो/व्हा. 9826992811

मित्रता दिवस जोहार..

सबो संगी मनला मित्रता दिवस के बधाई संग जोहार..
   अगस्त महीना के पहला इतवार के हमर देश भारत के संगे-संग अमेरिका, बंग्लादेश, मलेशिया अउ संयुक्त अरब अमीरात आदि देश म मनाए जाने वाला फ्रेंडशिप-डे माने संगवारी दिवस मनाए जाथे. वइसे कतकों देश म ए मित्रता दिवस ल आने-आने तारीख म घलो मनाए जाथे.
   आवौ जानथन ए मित्रता दिवस मनाए के इतिहास ल. फ्रेंडशिप-डे के शुरुआत सन् 1930 म संयुक्त राज्य अमेरिका के हॉलमार्क कार्ड कंपनी के संस्थापक जॉयस हॉल ह करे रिहिसे. वो ह अपन तीर-तखार के संगी मनला ग्रीटिंग कार्ड दे के फ्रेंडशिप-डे मनाए के सुझाव दे रिहिसे. ए दिन ल खास बनाए बर वो ह 2 अगस्त ल जोंगे रिहिसे.
    बाद म एशिया महाद्वीप के बहुत अकन देश मन घलो फ्रेंडशिप-डे मनाए ले धरीन. आगू चल के डॉक्टर रमन आर्टिमियो नॉव के मनखे ह पैराग्वे देश म 20 जुलाई के अपन संगी मन खातिर एक पार्टी रखिस अउ इही तारीख ल अंतर्राष्ट्रीय फ्रेंडशिप-डे खातिर प्रस्ताव रखिस.
    वो ह वर्ल्ड फ्रेंडशिप क्रूसेड नॉव के संस्था के संस्थापक रिहिस. ए संस्था ह 30 जुलाई ल अंतर्राष्ट्रीय फ्रेंडशिप-डे खातिर जोंगिस. तब ले हर बछर पैराग्वे म अंतर्राष्ट्रीय फ्रेंडशिप-डे मनाए जाथे.
    सन् 1998 म संयुक्त राष्ट्र के पूर्व महासचिव कोफी अन्नान के सुवारी नैन अन्नान ह संयुक्त राष्ट्र संघ म कार्टून कैरेक्टर विनी-द-पूह ल दोस्ती के अंतर्राष्ट्रीय दूत चुनिस. एकर बाद 27 जुलाई 1911 के संयुक्त राष्ट्र संघ के आम सभा ह 30 जुलाई ल अंतर्राष्ट्रीय फ्रेंडशिप-डे घोषित कर दिस. तब कतकों देश म इही तारीख ल अंतर्राष्ट्रीय फ्रेंडशिप-डे के रूप म चुनीन. तभो ले दुनिया के कतकों देश म अलग-अलग तारीख म अंतर्राष्ट्रीय फ्रेंडशिप-डे मनाए जाथे. हमर देश म अभी अगस्त महीना के पहला इतवार के मित्रता दिवस मनाए जाथे.
-सुशील भोले
मो/व्हा. 9826992811

कला अउ साहित्य के संगम रहिस सीताराम

16 अगस्त जयंती म सुरता//
कला अउ साहित्य संगम रहिस डॉ. सीताराम
    छत्तीसगढ़ी साहित्य जगत म अइसन कतकों रचनाकार आवत रेहे हें, जे मन साहित्य विधा के संगे-संग कला विधा ल घलो धर के संगे-संग रेंगत रेहे हें. डॉ. सीताराम साहू घलो अइसने रचनाकार रहिसे जे उच्च कोटि के कलाकार होए के संगे-संग मयारुक रचनाकार घलो रिहिसे.

   मोर जइसन अक्खड़ अउ तार्किक स्वभाव के जनवादी रंग म रंगे पत्रकार-साहित्यकार ल विशुद्ध अध्यात्म के रद्दा म लेग के कठोर साधना म बोरना कोनो आसान बात नोहय, फेर मोर जिनगी म सीताराम साहू जइसन एक मनखे के आगमन घलो होइस, जेन मोर असन घेक्खर मनखे ल ए बुता कराए म सबले बड़का भूमिका निभाइस.

     रायपुर ले लगे प्रसिद्ध बंजारी धाम वाले गाँव रांवाभांठा के मोर साहित्यिक संगवारी डाॅ. सीताराम साहू के मोर जिनगी म सबले अलगेच ठउर हे. 16 अगस्त 1962 के महतारी कौशिल्या देवी अउ पिता डाॅ. मोहन लाल साहू के घर जेठ बेटा के रूप म जनमे सीताराम संग मोर दोस्ती साहित्यकार के रूप म ही रहिस. मोर संपादन म वो बखत प्रकाशित होवइया छत्तीसगढ़ी भाखा के मासिक पत्रिका "मयारु माटी" के चेतलग पाठक होए के संगे-संग हमन दूनों रायपुर के छत्तीसगढ़ी साहित्य समिति संग घलो जुड़े रेहेन, तेकर सेती जम्मो किसम के साहित्यिक कार्यक्रम मन म संघरत राहन. आगू चलके मोर रिकार्डिंग स्टूडियो चालू होइस. उहू म इंकर खुद के लिखे जसगीत मनला इंकर सुवारी अउ हमर छत्तीसगढ़ के मयारुक जसगीत गायिका अनसुइया साहू के आवाज म आडियो कैसेट के रूप म निकाले रेहेन, जेन गजब लोकप्रिय होए रिहिसे.

   पहिली मोर प्रिंटिंग प्रेस के घलो ठीहा रिहिसे, जिहां  ले सीताराम के कविता मन के संकलन "डोंहड़ी" के प्रकाशन होए रिहिसे. बाद म तो अइसे दिन घलो आइस जब कहूँ साहित्यिक-सांस्कृतिक कार्यक्रम म जाना होवय त हम दूनों ही जावन. तीर-तखार म तो मोटरसाइकिल म मसक देवन. दुरिहा रहय त बस-रेल के माध्यम ले.

   चिकित्सा पेशा ले जुड़े होय के बाद घलो सीताराम एक उच्च कोटि के लेखक होए के संगे-संग मयारुक कलाकार घलो रिहिसे. अपन गाँव रांवाभांठा म वो ह एक समिति बनाए रिहिसे "माँ बंजारी महिला मानस मंडली" के नाम ले जेकर संचालक अपन जिनगी के संगवारी अउ लोकगायिका अनसुइया साहू ल बनाए रिहिसे. आज घलो ए समिति ह पूरा क्षेत्र म एक लोकप्रिय अउ प्रतिष्ठित समिति के रूप म जाने जाथे.

  सीताराम अपन लेखन के क्षेत्र म आए के बात ल "डोंहड़ी" काव्य संकलन म लिखे हे- छत्तीसगढ़ म सांस्कृतिक मंच के जयघोष करइया "चंदैनी गोंदा" कार्यक्रम ल देखे के बाद वोमा के लक्ष्मण मस्तुरिया के जम्मो गीत मन मोर दीमाग म चौबीसों घंटा गूंजत राहय. अउ मोर संपादन म प्रकाशित 'मयारु माटी' म वो बखत  छपत रहे, बड़े-बड़े रचनाकार मन के रचना मनला पढ़के लेखन के रद्दा म आएंव.
  सीताराम के 'डोंहड़ी' संकलन के कुछ रचना के अवलोकन करिन-

साज सम्हर के आइस देवारी, लक्ष्मी धन बरसावत
माटी के दीया ह करिस अंजोरी, चंदा देख लजावत
धन, धान्य, भंडार भरपूर, भरे राहय तोर ढाबा
मांग करत हंव लक्ष्मी ले मैं, पूरा होवय तोर आसा
नवा फसल म नवा उमंग हे, नवा देवारी फलदायक हो
नवा जोत हे नवा जीवन म, सब ल देवारी मुबारक हो

  गरमी के मौसम म पछीना बोहाए के चित्रण देखव-
बहे पछीना अंग ले टप-टप, सात धार हे गंगरेल कस
अउंट गये सब लाल लहू, तन होगे मछरी भुंजवा कस
मुंह अइलाये दवना पाना, कोन डार जल हरियावय
छूटत हे जब प्रान तपन म, गोरिया काया करियावय

   'दीया फूटगे' शीर्षक के दू लाईन देखव-
दीया फूटगे अंजोर कइसे होही
तेल गिरगे अब कोन सिरजोही
मंहगाई ल देख-देख दीया ह रोये
तेल बिन बरय कइसे गजब बिटोये
बाती गुनत हे उछला कोन रितोही
दीया फूटगे अंजोर कइसे होही

  हमर भारतीय नवा बछर एक सुग्घर चित्रण देखव-
अन्न कुंवारी चुरू-मुरू जब कोठी पउला बीच बीराजे
फुरसुद होगे खेत कमइया महीना माघ अमुवा मौरागे
भरिस मड़ाई गाँव गाँव मुठिया फरा झट उसनागे
साज सवारी रेंगिस मेला तब लागिस नवा बछर आगे

   ए जम्मो रचना उंकर शुरुआती दिन के आय. एकर मन के छोड़े एक अउ कविता संकलन "खोरसी" के घलो  प्रकाशन होए रिहिसे. एकर मन के छोड़े- करिया बादर (गीत संकलन), पूजा के फूल (गीत संकलन) अउ बुधवा के बोकरा (व्यंग्य संकलन) ह छपे के अगोरा म रिहिसे. सीताराम के लिखे जसगीत मन पूरा छत्तीसगढ़ म आडियो कैसेट के माध्यम ले धूम मचावत रिहिसे. उंकर सुवारी अनुसुइया साहू के स्वर म आकाशवाणी अउ दूरदर्शन म घलो अपन ठउर बनावत रिहिसे, तभे 17 मार्च 2010 के ए बहुमुखी प्रतिभा के धनी कलाकार-साहित्यकार के अपन पाछू पुत्र डाॅ. दीपक, पुत्री किरण के संगे-संग भरेपूरे परिवार अउ साहित्यिक संगी मनला बिलखत छोड़के परलोक गमन होगे.

     छत्तीसगढ़ राज बने के पहिली अउ बने के बाद तक इहाँ छत्तीसगढ़ी भाखा म विडियो फिलिम के घलो एक अच्छा दौर चले रिहिसे. जगा-जगा विडियो थियेटर अउ छट्ठी-बरही जइसन आयोजन मन म टीवी सेट म वीसीआर लगा के छत्तीसगढ़ी विडियो फिलिम मन ल गजब देखे जावय. ए दौर म डाॅ. सीताराम ह घलो चरित्र अभिनेता के रूप म अपन अभिनय कला के जौहर देखावत रिहिसे. सरकारी गोल्लर म हवलदार के रोल, माल हे त ताल हे म भैया के रोल, टूरी मारे डंडा म बाप के रोल, लेड़गा के बिहाव म भांटो के रोल अउ झोलटूराम म बाप के रोल करे रिहिसे. एमन म के कुछ फिलिम मन म उंकर सुवारी अनसुइया साहू ह घलो अभिनय करे रिहिसे. ए फिलिम म के 'टूरी मारे डंडा' ह अभी यूट्यूब म घलो उपलब्ध हे.
-सुशील भोले
संजय नगर, रायपुर
मो/व्हा. 9826992811

मोला घुनासी लागत हे..

सुरता//
मोला घुनासी लागत हे..
    आज जिनगी के संझौती बेरा म जब नींद ह छपक के धरे म घलो बुलक देथे, चोबिसों घंटा अलथी-कलथी मारे म लट्टे-पट्टे तीन चार घड़ी के पुरती अमा पाथे, त लइकई के वो दिन के सुरता गजब आथे जब कापी-किताब ल आगू म मढ़ाते नींद ह झुमराय लगय अउ पढ़ई-लिखई ल छोड़ के तनिया के सूत जावन.
   हमर महतारी बतावय, लइकई म रतिहा बेरा बियारी कर के जब सबो भाई-बहिनी पढ़े बर बइठन त मोला गजब उंघासी आवय. कापी-किताब आगू माढ़े राहय अउ मैं नींद म झुमरत राहंव, अउ जब कोनो मोला हुदर के पढ़े बर काहय त मैं 'मोला घुनासी लागत हे, अब सूतहूं' कहिके उहिच जगा ढलगे ले धर लेवौं. तब हमर सियान मोला गारी देवत काहय- 'जहाँ पढ़े ले बइठिस तहाँ एकर झुमरई चालू' काहत खिसिया जावय अउ फेर मोला सूते खातिर छुट्टी मिल जावय.
   अइसन घटना मोर जिनगी म कक्षा तीन के पढ़त ले घटय. जब मैं 'उंघासी' शब्द के उच्चारण ल 'घुनासी' लागत हे काहत राहंव. तब तक हमन भाठापारा शहर म राहत रेहेन. चौथी कक्षा ले मोर पढ़ई हमर पैतृक गाँव नगरगाँव म होइस, अउ हमर सियान अपन स्थानांतरण करवा के भाठापारा ले रायपुर आगे रिहिन, वोकर बाद तो अइसन दृश्य कभू नइ बनिस.
    आज जिनगी के छठवाँ  दशक म पाॅंव रखत वो दिन के सुरता गजब आथे, जब नींद ह हमन ल संगवारी बरोबर पोटारे राहय. उठत-बइठत पढ़त-लिखत मितानी के झुलना झुलावत राहय. तब खटिया देखे के जरूरत परय न बिछौना के. जेन जगा बइठे राहन उहिच जगा ढलंग जावन.
    आज जिनगी के संझौती बेरा म जब खटिया च ह जिनगी के संगवारी बन गे हावय त नींद ह बैर भाॅंजत रहिथे. लकवा के अभेरा म परे के बाद तो चोबिसों घंटा अलथी-कलथी करत रहिथौं तभो लजकुरहिन नोनी कस नींद ह एती-वोती छॅंडलत-बुलत रहिथे.
    अइसन बेरा म वो लइकई के सुरता गजब आथे, मन होथे, फेर मैं 'मोला घुनासी लागत हे' काहत निसफिक्कर होके चार घड़ी सूत लेतेंव.
-सुशील भोले
संजय नगर, रायपुर
मो/व्हा. 9826992811

चातुर्मास म देव बिहाव..

चातुर्मास म देव-बिहाव
    हमर देश के सांस्कृतिक पटल म विविधता के गजब अकन रूप देखे ले मिलथे. जेन ह एक-दूसर के विपरीत घलो जनाथे.
    अभी हमर छत्तीसगढ़ के सांस्कृतिक स्वरूप ल ही देख लेवौ, एक डहार जिहां कतकों साधू बैरागी मन चातुर्मास के नियम म बंधाय एक जगा बइठ के जप-तप अउ ज्ञान चर्चा म दिन पहावत हें, त दूसर डहार इहाँ के पारंपरिक संस्कृति ल जीने वाला मन अपन-अपन देवता के बर-बिहाव के जोखा मढ़ावत हें
     सुने म अलकर जना सकथे के चातुर्मास के जेन चार महीना म बर-बिहाव जइसन बुता ल अशुभ अउ प्रतिबंधित बताए जाथे, उहिच प्रतिबंधित महीना म छत्तीसगढ़ म देवी-देवता मन के बिहाव के परब मनाए जाथे.
    ए ह सांस्कृतिक विविधता के गजबे सुग्घर रूप आय, जे ह ए बात के घलो आरो कराथे, के छत्तीसगढ़ के मूल संस्कृति म चातुर्मास जइसन व्यवस्था लागू नइ होवय.
   अभी बरसात के मौसम म बस्तर अंचल म बरखा के देवी देवता के रूप म चिन्हारी करइया भीमा अउ भीमिन के बिहाव के उत्सव या जगार मनाए जावत हें, त हमर एती चातर राज म कातिक अंधियारी पाख के अगोरा होवत हे, जब गौरा-ईसरदेव के बिहाव के परब ल गौरी-गौरा पूजा के रूप म मनाए जाही.
    बस्तर म भीमा भीमिन ल साल पेंड़ के लकड़ी के बनाए जाथे अउ स्थायी रूप ले स्थापित करे जाथे, जबकि एती चातर राज म गौरा-ईसरदेव ल हर बछर माटी के बनाए जाथे अउ बिहाव परब कातिक अमावस के बिहान भर कोनो तरिया नंदिया म विसर्जित कर दिए जाथे.
    जेन बछर पानी के गिरई थोकिन कमती असन जनाथे ते बछर तो गाँव गाँव म भीमा भीमिन के पूजा अउ बिहाव परब मनाए जाथे. वइसे भीमा भीमिन के पूजा तो लोगन हमेशा करत रहिथें, काबर ते इनला बरखा के देवता के संगे-संग गाँव के कुल देवता घलो माने जाथे, एकरे सेती इनला सुख समृद्धि के देवता के रूप म घलो माने-गौन करे जाथे.
    गौरा-ईसरदेव के बिहाव परब ह कातिक अंधियारी पाख के पंचमी तिथि ले फूल कुचरे के नेंग संग चालू होथे. कोनो कोनो गाँव म फूल कुचरे के नेंग ल एकादशी के दिन करे जाथे.
    पंचमी के फूल कुचरे के नेंग करे के संग इहाँ सुवा नाच के परंपरा घलो चालू हो जाथे. नोनी मन बिहनिया बेरा कातिक नहाए ले जाथें अउ संझा बेरा सुवा नाचे ले जाथें.
    मैं हमेशा ए बात ल गोहरावत रहिथौं के छत्तीसगढ़ के सांस्कृतिक चिन्हारी ल इहाँ के मूल संस्कृति के मापदंड म लिखे अउ बताए जाना चाही, आने अंचल ले लाने गे संस्कृति अउ ग्रंथ मन के मापदंड म नहीं, तेन ह अइसने विरोधाभासी प्रसंग मनला देख के ही आय.
     इहाँ कतकों अइसन परब तिहार हे जे मन आज बताए जावत प्रसंग मन ले अलगे रहिथे, हमला इही मनला जांच-टमड़ के छत्तीसगढ़ के वास्तविक रूप के चिन्हारी दुनिया के आगू म करवाना हे.
-सुशील भोले
संजय नगर, रायपुर
मो/व्हा. 9826992811

काव्य लेखन अउ खुमान साव

छत्तीसगढ़ी  पद्य लेखन अउ खुमान साव....

    दुनिया म जतका भाखा हे,  सबो के लेखन अउ उच्चारण म कोनो न कोनो किसम के मौलिकता जरूर हे, एकरे सेती वोकर सबले हट के अलग अउ स्वतंत्र पहचान बनथे।

     हमर छत्तीसगढ़ी के पद्य लेखन म घलो एक अलग अउ स्वतंत्र चिन्हारी हे, एकर लेखन स्वर अउ ताल के माध्यम ले लिखे के हे। छत्तीसगढ़ी पद्य ल स्वर अउ ताल बद्ध लिखे जाथे। महान संगीतकार स्व. खुमान लाल साव जी एकर संबंध म एक बहुत बढ़िया उदाहरण देवंय। उन बतावंय के "चंदैनी गोंदा " के रिकार्डिंग खातिर जब वोमन मुंबई गे राहंय, त एक करमा गीत - 'दिया के बाती ह वो कइसे सच बात ल कहिथे जरे के बेरा' म ताल पांच मात्रा के बाजय।

     उन बतावंय के दुनिया म अउ कहूं पांच मात्रा के विषम ताल नइ होवय। सब म दू अउ चार मात्रा के सम ताल होथे।

     उन बतावंय, बंबई के जतका संगीतकार उहाँ बइठे राहंय, सब माथा धर लिए राहंय, वोमन म के एको संगीतकार बहुत कोशिश करे के बावजूद वो पांच मात्रा के ताल ल बजा नइ पाइन।

    आज छत्तीसगढ़ी म घलो अपन मौलिक चिन्हारी ल छोड़ के दूसर भाषा मन के परंपरा ल लिखे अउ लादे के रिवाज चल गे हवय। दूसर भाषा के लेखन शैली ल थोर बहुत अपनाना तो स्वागत योग्य बात आय। फेर आरुग दूसर भाषा के लेखन शैली ल ही हमर मूड़ में खपल देना ल स्वीकार नइ करे जा सकय।

आजकाल कविता के नॉव म हिन्दी, उर्दू अउ आने-आने भाखा मन के काव्य लेखन के परंपरा के जइसन बढ़वार हमर इहाँ देखे ले मिलत हे, वो ह सोचे के बात आय।

    कोनो भी भाषा के विकास अउ सम्मान वोकर खुद के लेखन रूप के बढ़वार हो सकथे, आने के परंपरा ल अपनाय अउ थोपे म नहीं।

    खुमान साव जी जब मोर 'रिकार्डिंग स्टूडियो' रिहसे त उन जब कभू रायपुर आवयं, त मोर जगा बइठे खातिर जरूर आवयं, तहाँ ले  मंझनिया भर हमर मन के कतकों विषय ऊपर गोठबात चलत राहय. उन काहंय- सुन न सुशील, जे मन हिन्दी काव्य परंपरा के मुताबिक लघु गुरु के मात्रा ल गनत रहिथें न, ते मन मोला एक नइ सुहावय.

-सुशील भोले
संजय नगर, रायपुर
मो. 9826992811

एकलव्य परंपरा.. दिनेश चौहान

24 जून जनमदिन//
एकलव्य परंपरा के साधक दिनेश चौहान
    कतकों मनखे ल मैं देखे हौं बिना काकरो अंगरी धरे, अपने सुर म रेंगत रहिथें. जइसे एकलव्य ह सिरिफ अपन मन म ही गुरु के छापा बसा के धनुर्विद्या के जम्मो मरम ल जान अउ सीख गे. ठउका अइसने दिनेश चौहान घलो हे जे अपन लगन ल ही गुरु मान के लेखन के संगे-संग चित्रकला म घलो पारंगत होगे हवय.
   दिनेश चौहान के असली नॉव हे दिनेश कुमार ताम्रकार फेर ए ह रचना संसार म अपन नॉव ल दिनेश चौहान ही लिखथे. वइसे उंकर महतारी ह मया कर के उनला 'राजेन' कहिथे.
    भीमसेनी एकादशी परब 24 जून बछर 1961 के धमधा जिला दुर्ग म महतारी अगासबाई ताम्रकार अउ सियान रामकृष्ण ताम्रकार जी के घर जनमे दिनेश पेशा ले सरकारी गुरुजी हे. फेर बड़ा अचरज के बात ए आय के आज तक मैं एकर भीतर सरकारी गुरुजी वाले कोनो चिन्हा नइ देखेंव.
    सुभाव ले आध्यात्मिक होय के सेती दिनेश जी संग मोर गजबे जमथे. साधना काल म जब कभू मोला राजिम त्रिवेणी संगम के कुलेश्वर महादेव के दर्शन के साध होवय, त दिनेश ल ही फोन करौं.
   दिनेश जी तुरते तइयार हो जावय, हाँ आना भाइया आप के संग म मोरो देव दर्शन हो जाथे. नइते भले हम रहिथन नवापारा राजिम म फेर देवता मन के दर्शन पैलगी बर महीनों बीत जथे.
    वइसे उमर म मोर ले एक हफ्ता के बड़े हे दिनेश चौहान ह फेर भइया संबोधन ल उही च ह करथे.
   दिनेश चौहान जी एक उत्कृष्ट श्रेणी के पाठक आय, एकरे सेती वोमन हिंदी अउ छत्तीसगढ़ी दूनोच भाखा म गुरतुर लिखथें. दिनेश जी जतका सुंदर लेखन करथें वतकेच सुंदर चित्रकला म घलो निपुण हें. मैं बेरा बेरा म उंकर जगा अपन प्रकाशन ले संबंधित चित्र बनवावत रहिथौं.
     अपन नियम कायदा के पक्का होय के सेती दिनेश चौहान जी कतकों बेर सरकारी तंत्र संग जूझत घलो राहय. एक बेर मैं उनला पूछेंव त उन रचनात्मक जगत म अपन नॉव ल बदल के लिखे के कारण घलो इही आदत ल बताइस.
    वोकर कहना रिहिस- सरकारी रिकॉर्ड म जेन नॉव हे तेने नॉव ले कहूँ मैं सोंटा मारे छाप लेखन करहूं तब तो गड़बड़ हो जाही, तेकर ले नौकरी के अलगे अउ तुतारी बाजी के अलगे नॉव.
    छत्तीसगढ़ी भाखा खातिर गजब समर्पित अउ चेतलग हे दिनेश जी ह. उंकर कहना हे- 'जम्मो तरा के स्कूल मन म छत्तीसगढ़ी भाखा ल एक अलग अउ अनिवार्य विषय के रूप म पढ़ाए जाना चाही.'
    दिनेश जी बेरा बखत म अपन लेखन मनला प्रकाशन के अंजोर घलो देखावत रहिथें. उंकर सबले पहिली किताब आए रिहिसे- 'कइसे होही छत्तीसगढ़िया सबले बढ़िया.
    छत्तीसगढ़ी भाखा म वर्ग पहेली बनाय के उन सुग्घर उदिम करे रिहिन हें, एकरे ऊपर आधारित उंकर दूसरा किताब आए रिहिसे- चौखड़ी जनउला.
    अपन ताम्रकार समाज के रचनाधर्मी मन के चिन्हारी खातिर उंकर तीसरा किताब आए रिहिसे- सृजन साक्षी.
   छत्तीसगढ़ी भाखा खातिर फेसबुक म लगातार लिखत अपन पोस्ट मनला एकमई कर के चौथा किताब छपवाय रिहिन हें- छत्तीसगढ़ी बर तुतारी.
    दिनेश जी के पांचवा किताब 'साॅंच कहे तो मारन धावै' शीर्षक ले आए रिहिसे, जेमा अभी हालेच म बुलके महामारी 'कोरोना' के दूसर पक्ष ल लेके लिखे गे लेख मन के संगे-संग कुछ निबंध अउ व्यंग्य मनला संघारे गे रिहिसे.
    मोर साधना काल म अंगरी गिनउ संगवारी रिहिन हें, जेमा दिनेश जी घलो एक रिहिन हें. एकरे सेती जब कभू मोर राजिम क्षेत्र म जाना होवय, त सबले पहिली उनला सोर कर देवत रेहेंव. तहाँ फेर दूनों झन संघरा किंजरई फिरई करन.
     आज अपन जिनगी के बैसठ बछर पूरा करत दिनेश चौहान जी ल बधाई देवत गजब निक जनावत हे. एकर एक बड़का कारण तो इहू हे, के ए ह सेवानिवृत्त हो जाही, तब नंगत के किंजरई फिरई करही, हो सकथे महूं ल संगवारी बना ले करही.
    शुभकामना देवत मैं एक पइत फेर उनला गोहराहूं. मैं इहाँ के मूल संस्कृति खातिर ठोसलग बुता करे बर एक पइत चेताए रेहेंव, आज फेर सुरता देवावत हौं, उन अपन लेखन के विषय इहाँ के मूल संस्कृति अउ अस्मिता ल घलो बनावंय.
    जनमदिन के गाड़ा-गाड़ा बधाई...
-सुशील भोले
संजय नगर, रायपुर
मो/व्हा. 9826992811