मोती बानी....

सुशील भोले के सुन लेवव ये आय मोती बानी
सार-सार म सबो सार हे, नोहय कथा-कहानी

कोनो काम करे के पहिली मन म वोला गुन लेवव
नफा-नुकसान का होही सुपा म पहिली फुन लेवव

श्रद्धा के फल मिलथे वइसे जस चौमास के बरसा
कइसनो दनगारा छांड़े राहय, हरियाथे पूरा धरसा

जन सेवा ले बढ़ के नइये ये दुनिया म कहूं धरम
अपना लेथे जे ये मारग ल उही जानथे एकर मरम

काबर चुपरे राख ल बइहा, बनय ते मया चुपर लेना
छोड़ कपड़ा के उजराई, हिरदे ल उज्जर कर लेना

मया-पिरित अउ मीठ बोली ल जस देबे तस पाबे
मन-मंदरस म घोरे नइते, जुच्छा महुरा खाबे

नरम होथे जी वो फल ह जे होथे रसदार
ठक-ठकावत वो रहि जाथे जे होथे बेकार

रंगना हे त अंतस रंग, चोला के रंग उतर जाथे
घाम-पानी दूनो के मारे, फेर ये चोला सर जाथे

जिहां मुरख के पूजा होय उहां बिलमना नइ चाही
झर जाथे जस-कीर्ति, धन-दौलत नइ बांचय कांही

अपन दिया खुदे बनौ, खुद ल करौ अंजोर
मारग धलो खुदे बनावौ, झन भटकव चहुंओर

सुशील भोले
संजय नगर (टिकरापारा)  रायपुर (छ.ग.)
मोबा. नं. 080853-05931, 098269-92811
ब्लॉग -http://www.mayarumati.blogspot.in/
ईमेल - sushilbhole2@gmail.com
फेसबुक - https://www.facebook.com/kavisushil.bhole
यूट्यूब  -https://www.youtube.com/channel/UCJkmrUNIZo155cxuLV31rPQ/feed?activity_view=1