विजय मिश्रा अउ झंगलू-मंगलू

वरिष्ठ पत्रकार विजय मिश्रा जी हमार ठीहा म पधारे रिहिन. ए बेरा म उन अपन हालेच म छप के आए किताब 'गोठ झंगलू-मंगलू के' भेंट करिन.

   छत्तीसगढ़ राज्य बने के आरो बछर 2000 म जनाए ले धरत रिहिसे, ठउका उही बेरा म अक्टूबर 2000 ले उन दैनिक अग्रदूत म छत्तीसगढ़ी भाखा म समसामयिक विषय मन ऊपर हास्य-व्यंग्य के शैली म क्षणिका लिखे के शुरू करिन, जे ह अग्रदूत के पहला पेज म सरलग छपय. 

   ठउका इहिच बेरा म जे दिन छत्तीसगढ़ राज्य बने के घोषणा होइस, उहिच दिन 1 नवंबर 2000 ले टिकेन्द्रनाथ टिकरिहा जी घलो दैनिक अग्रदूत म ही छत्तीसगढ़ी भाखा म सरलग संपादकीय लिखे के शुरू करिन.

   छत्तीसगढ़ी भाखा के बढ़वार अउ प्रोत्साहन खातिर ए ह दैनिक अग्रदूत के जबर बुता रहिस. एक हिन्दी के दैनिक अखबार म छत्तीसगढ़ी म सरलग कॉलम संग संपादकीय के छपई. ए जबर बुता ल जब कभू छत्तीसगढ़ी भाखा के विकास के इतिहास लिखे जाही, त वोमा विशेष रूप ले उल्लेखित करे जाही.

   ए ह संयोग के बात आय के मोरो अखबार लाईन के शुरुआत ह दैनिक अग्रदूत ले ही होय हे. मोर जिनगी के पहला कविता अउ कहानी के प्रकाशन घलो दैनिक अग्रदूत म ही होय हे.

   आज जब भाई विजय मिश्रा जी ह अपन सरलग लिखे कॉलम के किताब रूप ल मोर घर म आ के भेंट करिन, त मोला गजबे निक लागीस संग म अपन वो जुन्ना दिन के सुरता घलो आगे. 

    विजय मिश्रा जी ल उंकर ए किताब 'गोठ झंगलू-मंगलू के' खातिर गाड़ा गाड़ा बधाई संग शुभकामना हे.

-सुशील भोले