डोंगरपाली .. चंद्रशेखर चकोर

चमत्कार के असली चेहरा देखावत 'डोंगरपाली'
    छत्तीसगढ़ी सिनेमा मन म अभिनय के संगे-संग लेखन, निर्माण अउ निर्देशन के बुता करइया चंद्रशेखर चकोर काली संझा कलाकार संगी गोविन्द धनगर संग हमर ठीहा पधारिन अउ अपन हालेच म विमोचन होय उपन्यास 'डोंगरपाली' भेंट करिन.
    चंद्रशेखर चकोर ल छत्तीसगढ़ म लोक खेल के संवर्धक के रूप म विशेष रूप ले जाने जाथे, फेर संग म ए ह एक अच्छा अभिनेता अउ लेखक घलो हे. छत्तीसगढ़ी के चौमासा पत्रिका 'बरछाबारी' के प्रकाशन संपादन घलो बड़ दिन ले करत रेहे हे.
    डोंगरपाली चंद्रशेखर चकोर के पहला उपन्यास आय. एकर पहिली एकर दू कहानी संकलन अउ खुद के लिखे ददरिया मनके संग्रह के संगे-संग सिनेमा के स्क्रिप्ट, नाटक आदि गजब लिखे हे.
    'डोंगरपाली' गाँव-गंवई म देखब म आने वाला वो चमत्कार के असल रूप ल देखावत उपन्यास आय, जेमा कोनो बइगा-गुनिया, पंडा-पुरोहित मन लोगन ल भरमा के अध्यात्म के असली रूप के बदला माया के अंधरा कुंआ-बावली म ढकेल डारथें.
    लेखक एक साहित्यकार होए के संगे-संग कलाकार अउ सिनेमा के निर्माता-निर्देशक घलो हे, तेकर सेती वोकर ए उपन्यास के भाषा, वोमा उकेरे गे दृश्य अउ विषयवस्तु जम्मो म वो सब जिनिस दिखाई देथे.
     चंद्रशेखर चकोर के ए पहला उपन्यास आय तभो वो  अपन भाव ल व्यक्त करे म सफल होय हे. भरोसा हे आगू चलके अउ सार्थक अउ कालजयी उपन्यास के सिरजन उंकर कलम ले होही अउ छत्तीसगढ़ी साहित्य के ढाबा ल पोठ करही. पहला उपन्यास डोंगरपाली खातिर चंद्रशेखर चकोर ल बधाई अउ भविष्य खातिर शुभकामना.
-सुशील भोले-9826992811