डा. खूबचंद बघेल के सुरता म जबड़ छत्तीसगढ़ी कवि सम्मेलन...

रायपुर। छत्तीसगढ़ राज्य के स्वप्नदृष्टा डा. खूबचंद बघेल के 114 वां जयंती के अवसर म बीते 18 जुलाई 2014 के रतिहा आजाद चौक, रायपुर के तीर कुर्मी भवन म जबड़ छत्तीसगढ़ी कवि सम्मेलन के आयोजन करे गिस।

कवि सुशील भोले के संयोजन अउ संचालन म आयोजित ये कवि सम्मेलन के मुखियाई समाज के कोषाध्यक्ष उमाशंकर वर्मा करीन, जबकि अध्यक्षता वरिष्ठ वकील अउ कवि उपेन्द्र कश्यप करीन। छत्तीसगढ़ महतारी अउ डा. बघेल ल अपन-अपन कवितांजलि अर्पित करत कवि मीर अली मीर, रमेश विश्वहार, रसिक बिहारी अवधिया, राजेन्द्र पाण्डेय, सुशील यदु, शकुंतला तरार, शशि तिवारी, उर्मिला देवी उर्मि अउ संध्या नलगुंडवार ह लम्बा बेरा तक सुरता राखे के लाइक माहौल बनाइन।

कवि सम्मेलन शुरू होये के पहिली समाज के रायपुर महानगर के अध्यक्ष बी. आर. वर्मा, सचिव भगवती वर्मा, राजेन्द्र वर्मा, महिला प्रमुख सरिता बघेल, अन्नू कश्यप आदि मन जम्मो कवि मन के शाल, फूल-माला ले सुवागत-सत्कार करीन। आखिरी म प्रवक्ता सुनील नायक ह जम्मो कवि, साहित्यकार अउ उपस्थित श्रोता मन के आभार व्यक्त करीस।  

(नीचे के दू फोटू 19 जुलाई के आय बघेल जयंती के कार्यक्रम के )