राजभाखा बनाम जोक्कड़ आयोग के बदलही का भाग....?

राजभाखा बनाम जोक्कड़ आयोग के बदलही का भाग....?
नवा छत्तीसगढ़ राज बने के बाद इहां के भाखा, इहां के संस्कृति अउ  जम्मो चिन्हारी के आरुग अउ अलग रूप दिखही अइसे भाखा-साहित्य अउ कला-संस्कृति संग जुड़े लोगन ल भारी भरोसा रिहिसे, फेर पहिली अउ ओकर पाछू के दुसरइया सरकार के कारज ल देख के ए भरोसा आंसू ढारे बर धर लिए रिहिसे।
दूसरइया सरकार तो "छत्तीसगढ़ राजभासा आयोग" गठन कर के थोक-बहुत उछल-कूद घलोक करे के उदिम करत रिहिसे, फेर जेन मनखे के खांध म एकर बोझा ल बोहाय गे रिहीस हे, तेने ह उजबक किसम के मतवार होगे रिहीसे। एकरे सेती ए आयोग ह राजभाखा के बदला जोक्कड़ आयोग के रूप म जादा.देखब म आवय।
भाखा बर जतका कारज होवय ओकर ले जादा हा-हा भक-भक के उदिम जादा होवय। कविता के नांव म अश्लिल चुटकिला सुनाने वाले ले एकर ले जादा उम्मीद घलो कइसे करे जातीस? फेर वाह रे सरकार अउ ओकर जम्मो खेवनहार तुंहर सोच ल काय भूत धर लिए रिहिसे, ते ओकरे भरोसा जम्मो जुवाबदारी। अध्यक्ष के पद म बइठय तेनो मन थथमराय बरोबर रेहे राहय। चापलूसी करइया मन गदगद राहंय बस, फेर जे मन सही म भाखा-साहित्य-संस्कृति बर मरथें-खपथें तेकर मन के हिरदे उहां अउ ओकर संग हमर भाखा के होवत करलई अउ दुरगति ल देख के कलप डारंय।
अब नवा सरकार शपथ ग्रहण कर के बिराजमान होगे हवय, त लोगन ल भरोसा होवत हावय के अब दूसर विभाग के जइसे भाग बदले के उम्मीद दिखत हे, ठउका वइसने भाखा, साहित्य, संस्कृति अउ इहां के इतिहास ले जुड़े विभाग मन के भाग घलो बहुरही। हमर अस्मिता के छापा जगजग ले उज्जर अउ सुघ्घर दिखही।
वइसे भी नवा मुख्यमंत्री भूपेश बघेल जी ह आरुग छत्तीसगढ़िया अउ किसान के बेटा आय, अउ एकरो ले जादा उन खुद छत्तीसगढ़ राज आन्दोलन संग जुड़े रिहिन हें, ओकर अगुवाई करत रिहिन हें। तेकर सेती राज आन्दोलन ले जुड़े जम्मो किसम के भावना अउ मांग ल उन अच्छा से जानत हें। इही पाय के उंकर ले उम्मीद घलोक जादा जाग गे हवय, के उन हमर भाखा, संस्कृति अउ जम्मो अस्मिता के गौरव ल बढ़ाहीं। भाखा अउ संस्कृति के क्षेत्र म चापलूसी अउ दलाली के खेल खेलने वाला.मन के षडयंत्र-जाल ले एला उबारहीं, अउ सही मायने  म अलग राज बने के सपना ल साकार करहीं। हमर पुरखा मन जे उद्देश्य ल ले के अलग राज के सपना देखिन, ओकर खातिर आन्दोलन चलाईन, वोला पूरा करहीं।
जय छत्तीसगढ़.. जय छत्तीसगढ़ी...
-सुशील भोले
संजय नगर, रायपुर
मो. 9826993811